Korrosioaren aurkako propietateak dituzten material bimetalikoen eta beroko forjaketaren fabrikazioa L-DED bidez

Fabrikazio gehigarriaren metodoek aleazio desberdinen propietateak pieza berean konbinatzeko aukera ematen dute, aukera berriak zabalduz. Aplikazio bereziki interesgarri bat erresistentzia mekaniko handiko materialen korrosioarekiko erresistentzia hobetzea da; izan ere, material horiek berez ez dute babes hori ingurune erasokorretan.

Ikerketa honetan, aleazio antikorrosiboen gainazaleko geruza bat —AISI 316 eta Inconel 718— aplikatu da 42CrMo4 altzairu estrukturaleko zilindroen gainean, L-DED (laser bidezko estaldura) teknologiaren bidez. Ondoren, ohiko konformazio-prozesu baten eragina ebaluatu da: forja beroan. Horretarako, piezak deformazio maila desberdinekin forjatu dira 850 eta 1250 ºC-tan. Jarraian, piezaren osotasuna, mikroegituraren aldaketak eta estalduraren propietate antikorrosiboen kontserbazioa aztertu dira.

Osotasuna gogortasun-neurketen, mikroegituraren analisiaren eta likido penetratzaileen bidezko gainazal-akatsen detekzioaren bidez baloratu da. Korrosioarekiko erresistentzia ISO 9227 arauaren araberako gatz-lainoko saiakuntzen bidez aztertu da.

Lan honen helburua L-DED + forja beroa erabiliz erresistentzia mekaniko handiko eta herdoilgaitzak diren pieza bimetalikoen ekoizpena optimizatzea da, tenperatura eta deformazio parametro egokienak zehaztuz, bai osotasuna bai korrosioarekiko erresistentzia mantentzeko. Lortutako pieza bimetalikoek potentzial handia dute aplikazioetan, hala nola torlojugintzan, eskuzko tresnetan, esekidura-elementuetan eta hainbat araudi betetzeko. Erakusle gisa, prozesu optimizatuari jarraituz fabrikatutako M20 neurriko torloju bat aurkezten da.

Finantzaketa: Ikerketa hau Eusko Jaurlaritzako Garapen Ekonomiko, Jasangarritasun eta Ingurumen Sailak finantzatu du, KK-2023/00096 dirulaguntza-zenbakiarekin (ReIMAGIN proiektua, ELKARTEK 2023 programa).