EUSKATFUNDek eta AZTERLANek lankidetzan dihardute ingurumen-inpaktu txikiagoko moldaketa-sistemen ezarpen industriala errazteko ezagutza eta tresnak garatzen.
Galdaketa-industriak erronka bikoitzari egin behar dio aurre: prozesu jasangarriagoetara aurrera egitea eta ingurumen-inpaktua murriztea, ekoizpenaren kalitatea eta lehiakortasuna arriskuan jarri gabe. Testuinguru horretan, aglomeratzaile inorganikoen sistemek alternatiba erakargarria eskaintzen dute galdaketako moldeak eta arrak fabrikatzeko tradizionalki erabilitako erretxina organikoen aurrean, emisioak murrizteko eta materialen kudeaketa eraginkorragoa sustatzeko duten gaitasunari esker.
Hala ere, teknologia horien ezarpena oraindik mugatua da. Aglomeratzaile inorganikoen sistemen portaeran eragina dute hainbat faktorek, hala nola ingurumen-baldintzek, lehengaien ezaugarriek edo ekoizpen-prozesu bakoitzaren parametro espezifikoek. Sentsibilitate honek zaildu egiten du formulazio bera arrakastaz aplikatzea galdaketa eta industria-ingurune desberdinetan.
Erronka horri erantzuteko asmoz, EUSKATFUNDek eta AZTERLANek DESIA proiektuan parte hartzen dute. Ekimen honen helburua da sistema horiek instalazio bakoitzaren baldintza zehatzetara egokitzeko metodologia bat garatzea eta, horrela, etorkizuneko ezarpen industriala erraztea.
Proiektuaren barruan, EUSKATFUNDek erabilera-agertoki desberdinetara egokitutako formulazioen garapena gidatuko du, eta AZTERLANek materialen karakterizazioan, diseinu esperimentalean eta balidazio teknologikoan duen esperientzia eskainiko du. Elkarlanari esker, modu sistematikoan aztertuko da nola eragiten duten ingurumeneko tenperaturak eta hezetasunak, moldaketa-harearen ezaugarriek, piezen geometriak eta dimentsioek edo ontze-baldintzek sistema aglomeratzaileen portaeran.
DESIAren helburu nagusietako bat aldagaien eta aglomeratzaile inorganikoen azken prestazioen arteko harremana ezagutzea da. Horretarako, diseinu esperimentaleko metodologiak eta saiakuntza-kanpainak konbinatuko dira, prozesuko parametroen milaka konbinazio potentzial aztertzeko. Horren emaitza gisa, datu-base esperimental bat eraikiko da, portaera-ereduak identifikatzeko eta ekoizpen-ingurune bakoitzerako baldintza egokienak hautatzeko irizpideak ezartzeko.
Lortutako ezagutza hori izango da galdaketa baten baldintza espezifikoetara aglomeratzaile-sistemak egokitzen lagunduko duen tresna digital baten garapenaren oinarria. Helburua da saiakuntza eta errorearen logikan edo kasuz kasuko doikuntzetan oinarritutako estrategietatik datuetan oinarritutako ikuspegi sistematikoago baterantz egitea, soluzio horien transferentzia industria-ingurune berrietara erraztuz.
Garatutako formulazioen balidazio teknikoaz gain, proiektuak bizi-zikloaren analisia ere txertatuko du haien ingurumen-portaera ebaluatzeko. Sistema inorganikoek nabarmen murriztu ditzakete ohiko erretxina organikoei lotutako emisioak eta, gainera, galdaketa-hareen berreskuratzea eta berrerabilpena susta ditzakete. Bi alderdi horiek gero eta garrantzi handiagoa dute ekoizpen-eredu jasangarriagoetarako trantsizioan.
DESIA bat dator industriaren deskarbonizazioari, ekonomia zirkularrari eta baliabideen erabilera eraginkorrari buruzko Europako helburuekin. Dauden azterlanek erakusten dute aglomeratzaile inorganikoen sistemek nabarmen murriztu ditzaketela konposatu organiko lurrunkorren eta galdaketa-prozesuari lotutako beste kutsatzaile batzuen emisioak, eta aldi berean lantegietako ingurumen-baldintzak hobetzen lagun dezaketela.
26 hilabeteko iraupena aurreikusten duen proiektuak modu progresiboan landuko ditu industria-eskakizunen identifikazioa, formulazio berrien garapena eta balidazioa, eta haien ezarpenerako laguntza-tresnen sorrera. Sistema aglomeratzaile berriak garatzeaz harago, DESIAren helburua da ezagutza, metodologiak eta tresnak sortzea, moldaketa-teknologia jasangarriagoen adopzioa bizkortzeko eta galdaketa-industraren lehiakortasuna eta berrikuntza-gaitasuna indartzeko.
DESIA Eusko Jaurlaritzako Industria, Trantsizio Energetiko eta Jasangarritasun Sailaren Ekonomia Zirkularreko Berrikuntza Laguntzen Programaren bidez finantzatzen da.
