Carmelo Santamarina, AZTERLANeko Saiakuntza Ez-Suntsitzaileen (SES) arduraduna, Saiakuntza Ez-Suntsitzaileen Espainiako Elkarteko (AEND – Asociación Española de Ensayos No Destructivos), Iparraldeko Batzordeko idazkari izendatu dute. AEND erreferentziazko erakundea da Espainian SES teknologien sustapenean eta nazioartean aitortutako estandarren araberako profesionalen ziurtapenean.
Carmelo Santamarina, AZTERLANeko Saiakuntza Ez-Suntsitzaileen arduraduna
Izendapen honek AZTERLANek Saiakuntza Ez-Suntsitzaileen esparruko foro tekniko nagusietako batean duen parte-hartzea indartzen du. Foro horretan profesionalak, enpresak, ziurtapen-erakundeak, zentro teknologikoak eta materialen, osagaien eta industria-instalazioen fidagarritasunaren, segurtasunaren eta osotasunaren alde lan egiten duten erakundeak elkartzen dira.
1988an sortua, AEND irabazi asmorik gabeko elkarte tekniko-zientifikoa da, eta Saiakuntza Ez-Suntsitzaileen garapena eta hedapena sustatzen ditu prestakuntza, ziurtapen, ezagutza-transferentzia eta lankidetza teknikoko jardueren bidez. Era berean, normalizazio-ekimenetan aktiboki parte hartzen du eta sektoreko nazioko zein nazioarteko erakundeekin harreman estuak mantentzen ditu, SESen praktikak eta eskakizun teknikoak garatzen eta harmonizatzen lagunduz.
Bere jarduera nagusien artean dago langileen ziurtapena CERTIAEND erakundearen bidez, UNE-EN ISO 9712 arauaren arabera akreditatutako erakundea baita. Ziurtapen hori industriak oso aintzat hartzen du SES bidezko ikuskapenak egiten dituzten profesionalen gaitasun teknikoa egiaztatzeko erreferentzia gisa, eta ezinbesteko baldintza da emaitzen fidagarritasuna funtsezkoa den sektore eta proiektu askotan.
Izendapen honen aurretik, Carmelok harreman estua izan du AENDekin langileen ziurtapen-prozesuetan aztertzaile gisa parte hartuz, sektoreko profesionalen gaitasun teknikoen ebaluazioan zuzenean lagunduta. «Aztertzaile gisa izandako esperientziak aukera eman dit gertutik ezagutzeko AENDek ziurtapen-prozesuak garatzeko duen zorroztasun teknikoa. CERTIAENDek egiaztatutako kualifikazioa oso baloratua da industrian, profesionalen gaitasunarekiko konfiantza ematen duelako eta ikuskapenen kalitatea eta fidagarritasuna bermatzen laguntzen duelako». Carmeloren esanetan, elkartearen jarduerak eta nazioko zein nazioarteko antzeko erakundeekin dituen harremanek ere «ziurtapen-sistemaren aitortza eta sendotasuna indartzen dituzte».
AZTERLANen Saiakuntza Ez-Suntsitzaileen gaitasunak
AZTERLANek ibilbide zabala du Saiakuntza Ez-Suntsitzaileen (SES) teknikak aplikatzen material, osagai metaliko eta soldaduren ebaluazioan, industria-sektore ugaritan. Halaber, instalazioetan bertan zein bezeroen plantetan ikuskapenak egiten ditu, eta jarduera horietarako ENAC akreditazioa ezartzeko lanean ari da. Bere gaitasun nagusien artean honako hauek nabarmentzen dira:
- Tomografia eta Micro-tomografia axial konputarizatua (CT).
- Industria-radioskopia digitala.
- Ultrasoinu bidezko saiakuntzak (UT).
- Partikula magnetikoen bidezko saiakuntzak (MT).
- Likido sarkorren bidezko saiakuntzak (PT).
- Ikuskapen bisuala (VT).
AZTERLANeko Saiakuntza Ez-Suntsitzaileen taldeak laguntza teknikoa ere eskaintzen die enpresei, prozedurak garatzen, kalitate-sistemak ezartzen eta saiakuntzak gainbegiratzen.
Jarduera horiek gaitasun analitiko ugarirekin osatzen dira, horietako asko akreditatuak, material eta pieza metalikoen karakterizazio kimikoa, metalografikoa, mekanikoa eta korrosioarekiko portaeraren ebaluazioa egiteko. Horrez gain, akatsen diagnostikorako eta zerbitzuan gertatutako hutsegiteen analisirako zerbitzu aurreratuak ere eskaintzen dira.
Gainera, AZTERLANen Saiakuntza Ez-Suntsitzaileen gaitasunek funtsezko babesa ematen diote zentroaren ikerketa-jarduerari, material, prozesu eta diseinu industrial berrien garapena eta balidazioa ahalbidetuz, baita prototipatze aurreratuko jarduerak indartuz ere.
